Va ye rihê min, ji xwe re bibe
Bike bask, kevok
Bike dar bîhok
Bike xalxalok
Bike finda xwe
Lê êşa min nebe
Lê êşa min nebe
《Hey wax îî》
.
Hey ferhenga girînê
Hey asoya firînê!
Hey dîlana egîdan
Hey cezbeya mirîdan
Hey Dimdima minê
Serê Kaniyê
.
Va ye dilê min ji xwe re bibe
Bike narincok
Bike bablîsok
Bike şevçîrok
Bike doh, bike îro û sibe
Hey destana jînê
Hey taca bêriyê
Hey ximava birînê
Hey xwîna Serê Kaniyê
.
Va ye destên min
Ji xwe re bibe
Bike çeper û tiving
Bike sîtava Ferhad
Bike hawar û feryad
Û bike stûn û gizing
Bike darbest
Bike helbest
Û bi mirina min şa bibe
.
Hey gulistana janê
Hey serkêşa gaziyê
Hey daristana danê
Hey ava Serê Kaniyê
.
《Va ye dilê min ji xwe re bibe》
.
Va ye çavê min ji xwe re bibe
Bike şevçira
Bike berbang
Bike dergûşa pêxemberan
Bike hêlîna azadiyê
Bike rojçêbûn û wek sorgulan vebe
Hey sertaca zemanan
Hey qiblenameya ciwanan
Hey sirûda mizgîniyê
Hey keça minê Serê Kaniyê
.
Serê Kaniyê, Serê Kaniyê..
Hey dayika minê Serê Kaniyê
Hey xwîna Serê Kaniyê.