Vê sibehê, bi nîv emrê xezalê û bi sewta kewê
Birîna xwe şanî kevirekî didim, lê lê lê...
Ev heft roj in, heft gul vebûne li ser sînga dayê, li kolanê
Kê dît! kê nedît!
Li guhekî sax digerin gotinên min bi destpelînkê
Bi vî alî de diçim, dîwarekî bilind ji tenêtiyê
Li aliyê din xewek ji kirasê zivistanê
Li jor ezmanekî vikî vala!
.
Vê sibehê, bi nîv emrê xezalê û bi sewta kewê
Can diavêj im ji bedenê
Ev ne çîroka hûtekî heftserî ye, lê lê lê
Porkurê, ji binê erdê dengê çivîkan tê
Ji dengê xuşîna bayê tivingê û bêdengiya pitika li dergûşê
Dengê min ne diçe evda, û ne jî diçe xwedê
.
Tax ewrîn e, ba dicemidîne
Kolan sar e, lê lê lê
Xewna vî bajarî, stêrka vemirî
Sitûxwar e, digo ay lê lê lê
Hayho ev ax êdî yar e lê lê lê
Mirin bi kofî û bi kitan e lê lê lê
.
Vê sibehê, bi nîv emrê xezalê û bi sewta kewê
Birîna xwe şanî kevirekî didim, lê lê lê...
Ev heft roj in, heft gul vebûne li ser sînga dayê, li kolanê
Kê dît! kê nedît!
Li guhekî sax digerin gotinên min bi destpelînkê
Bi vî alî de diçim, dîwarekî bilind ji tenêtiyê
Li aliyê din xewek ji kirasê zivistanê
Li jor ezmanekî vikî vala!
.
Êdî ji vê sûkê nayê dengê çakûçê solkaran
Bi derziyê re çûye kumê Xezalê
Porê xwe vediçire kanûna kizirî
Xwezî, havînê kulavek ba ma li deriyê konê koçerekî
Herî xizanê êlê
Muhtacê dewê taştê, û tasek şîva germ li malê
Pêlî min bike, kî biçe û bê
Dibe ku min jî ji bîr bikira bêqismetiya hezarê salan
.
Vê sibehê, bi nîv emrê xezalê û bi sewta kewê
Can diavêj im ji bedenê
Ev ne çîroka hûtekî heftserî ye, lê lê lê
Porkurê, ji binê erdê dengê çivîkan tê
Ji dengê xuşîna bayê tivingê û bêdengiya pitika li dergûşê
Dengê min ne diçe evda, û ne jî diçe xwedê